• Sun. Nov 21st, 2021

AL2

…është media jote

Veseli dhe Laçi: Besojmë te mrekullitë, ndaj Anglisë do…

Byadmin

Nov 9, 2021

Kombëtarja shqiptare ka nisur që prej ditës së djeshme përgatitjet dhe stërvitjen në kuadër të dy ndeshjeve të fundit ndaj Anglisë dhe Andorrës, të vlefshme për kampionatin botëror “Katar 2022”. Në konferencën për mediat kanë dalë ditën e sotme Qazim Laçi dhe Frederic Veseli, të cilët kanë folur për këto dy sfida që kuqezinjtë do të luajnë fillimisht ndaj anglezëve në Uembli më 12 nëntor ndërsa tre ditë më vonë ndaj Andorrës më 15 nëntor.

Qazim Laçi iu përgjigj fillimisht interesit të gazetarëve, teksa u shpreh i lumtur për rikthimin në Kombëtare pas dëmtimit, si dhe theksoi se grupi po përgatitet dhe po punon fort që të japë maksimumin ndaj Anglisë. Ai foli edhe për nivelin e ekipit, duke thënë se konkurrenca është rritur.

Gjendja fizike – Ndihem shumë mirë tani. Kisha një dëmtim, e kalova shpejt. Jam shumë i motivuar që erdha këtu dhe ndihem çdo herë krenar që vij me ekipin Kombëtar. Dhe po pres me shumë shpirt e zemër për ndeshjet.

Reparti i mesfushës – Besoj nga e gjithë ana taktike, do të rregullojmë dhe do të punojmë si në mbrojtje, si në mesfushë, si në sulm pasi kemi kundërshtar që do të jetë shumë i fortë. Do të punojmë shumë mirë në këto dy-tre ditë dhe do të japim maksimumin për të marrë një rezultat pozitiv.

Anglia? – Të luash me ekipin e Anglisë, do të jetë një ndeshje shumë e fortë dhe e vështirë, por edhe ne do të përgatitemi shumë mirë, të marrim një rezultat dhe e kemi treguar veten  tonë në të gjitha ndeshjet që kemi bërë, të vazhdojmë të japim maksimumin  në këto dy ndeshje. Do jetë hera e parë që do të luaj në një stadium të tillë si Uembli. Kur vij me Kombëtaren emocionet janë të forta dhe jemi shumë të lumtur kur jemi këtu.

Konkurrencë në ekip? – Trajneri i bën zgjedhjet dhe jep formacionin. Konkurrenca e ekipit në këtë nivel që kemi arritur dhe me këtë kombëtare që kemi tani është shumë e madhe, është rritur konkurrenca mes nesh dhe kjo është diçka e mirë për ne. Në skema të ndryshme të trajnerit, lojtarët janë përshtatur.

Ndeshja ndaj Anglisë? – Do të jetë një ndeshje e vështirë dhe po përgatitemi. Do të kemi një kundërshtar që ishte finalist në EURO 2020 dhe po përgatitemi mentalisht dhe fizikisht për të bërë ndeshjen më të mirë. Do të japim maksimumin dhe të shpresojmë për rezultat.

Frederic Veseli, i cili luan me ekipin e Salernitanës në Itali u shpreh se në ekip atmosfera është e mirë dhe se djemtë besojnë se mund t’ia dalin, pasi edhe në ndeshjen e fundit ndaj anglezëve, ekipi ka bërë një paraqitje të mirë. Ai foli edhe për mbrojtjen kuqezi, si një nga shtyllat e kësaj Kombëtareje, teksa foli edhe për mungesën e Gjimshitit.

Atmosfera në ekip – Atmosfera është e mirë deri tani dhe për mrekulli besojmë çdo herë. Më tepër se mrekulli është një ëndërr, kemi dhe pak shanse dhe do të japim maksimumin tonë. Na ka mbetur edhe pak peng ndeshja me Poloninë, ku kemi pasur vërtetë mundësinë për të marrë të paktën një pikë sepse e kemi treguar veten në fushë.

Ndeshja ndaj Anglisë – Edhe në ndeshjen e fundit me Anglinë, besoj se kemi bërë një paraqitje të mirë. Gati të gjithë lojtarët e mbrojtjes luajnë në Serinë A, një kampionat ku niveli i mbrojtësve është shumë i famshëm. Është kënaqësi të luash kundër Harry Kane dhe të tjerëve. Secili të japë maksimumin e vet, ne të gjithë kemi vetëbesim dhe mirëkuptim njëri me tjetrin dhe kush luan më mirë dhe kush ka më shumë fat, e fiton ndeshjen.

Gjendja fizike – Sinqerisht kam mundësi, kam qenë me Covid për dy javë dhe kam një javë stërvitje. Dy ndeshjet e fundit ndaj Hungarisë dhe Polonisë kam qenë i dëmtuar me ligament në gju për dy muaj dhe pata vetëm një javë e gjysmë stërvitje. Besoj se e kam treguar veten nga çdo anë që isha gati dhe këtë herë nuk është asgjë ndryshe. Me këtë javë që bëra stërvitje në fushë me ekipin kam dhënë maksimumin. Kemi edhe disa ditë për t’u stërvitur. Unë jam gati, pastaj vendos trajneri, por me vetëbesim unë jam gati.

A mund t’ia dalë Kombëtarja në këto dy ndeshje? – Si grup mund t’ia dalësh. Nëse punon mirë, mund t’ia dalësh. Por ndikojnë shumë dyluftimet, secili duhet të marrë përgjegjësitë dhe të luajë një kundër një dhe të japim maksimumin për mos t’i humbur. Pastaj, edhe ndihma e shokut do të ishte edhe më e mirë. Gjëja më e rëndësishme për t’u mbrojtur kundër lojtarëve të Anglisë do të ishte të pranonim dyluftimin individual.

Mungesa e Gjimshitit? – Mungesën e Gjimshitit e vuajmë. Berati është një lojtar me shumë cilësi dhe luan shumë mirë. Të gjithë jemi gati ta zëvendësojmë, si ka ndodhur edhe në dy ndeshjet e fundit ku e zëvendësova unë. Çdo ekip ka dëshirë të ketë ekipin komplet. Secili lojtar ka përparuar në vitet e fundit dhe e kemi rritur nivelin e Kombëtares dhe mund ta zëvendësojmë njëri-tjetrin shumë lehtë.

Leave a Reply

Your email address will not be published. Required fields are marked *