• Mon. Nov 22nd, 2021

AL2

…është media jote

Belgjika i heq kurorën Portugalisë, Çekia çon në shtëpi Holandën (VIDEO)

Byadmin

Jun 27, 2021

Portugalia kampione në fuqi të Europës dorëzon kurorën që në fazën e 1/8-ave, pasi u mposht me rezultatin minimal 1-0 nga Belgjika në “Estadio de la Cartuja” të Sevillas dhe i dha fund aventurës në Euro 2020.

Nuk arrin dot të lërë gjurmë Cristiano Ronaldo në këtë ndeshje, pasi bëri shumë pak për të shmangur humbjen, ndërsa Belgjika siguroi kalimin në çerekfinale falë një perle të Thorgan Hazard nga distanca, në minutat e fundit të pjesës së parë.

Sfida nisi menjëherë vrullshëm për Portugalinë, që iu afruar ndjeshëm golit në minutën e 6’, por sulmuesi i Liverpoolit, Diogo Jota gjuajti shumë keq dhe dërgoi topin jashtë, ndonëse në një pozicion mjaft të mirë shënimi.

Provon të reagojë Belgjika, por është e paqartë në manovrën e saj sulmuese, ndërsa në minutën e 25-të është radha e Ronaldos që të tregojë aftësitë me një goditje dënimi, por gardiani Thibaut Courtois grushtoi në mënyrë spektakolare, duke ruajtur rrjetën të paprekur.

Kur dukej se pjesa e parë do të mbyllej në barazim pa gola, “djajtë e kuq” të Europës dolën në një kundërsulm të shpejtë me Lukakun, që shërbeu për De Bruyne dhe më pas topi shkoi te Thorgan Hazard, që lëshoi një ta djathtë spektakolare nga distanca, duke dërguar sferën në rrjetën e portës së Rui Patricios.

Pjesa e dytë nisi menjëherë me një lajm të keq për belgët, pasi fantazisti Kevin De Bruyne kërkoi zëvendësim pas pak sekondash, për shkak të një dëmtimi dhe në vendin e tij u aktivizua sulmuesi i Napolit, Dries Mertens.

Në minutën e 58’ Portugalia pati mundësinë më të mirë për të rikthyer baraspeshën, por edhe pse në një pozicion të favorshëm brenda zonës, gjuajti keq, duke dërguar topin mbi kuadratin e portës së mbrojtur nga Courtois.

Trajneri i Portugalisë bën disa zëvendësime për të freskuar ekipin dhe në minutën e 82-të është mbrojtësi i Manchester City-t, Ruben Dias që u shkon pranë golit të barazimit, por gjuajtja e tij me kokë ishte qendrore dhe u grushtua nga portieri belg.

Vetëm një minutë më vonë ishte anësori që luan për Borussian e Dortmundit, Raphael Guerreiro që gjeti shtyllën pingule me një gjuajtje të bukur brenda zonës, ndërsa në të 88-ën ishte Courtois që bëri sërish heroin për belgët, duke pritur në dy kohë një gjuajtje të Andre Silvës.

Pas kohës së rregullt dhe 5 minutave shtesë, rezultati mbeti i pandryshuar, me Portugalinë që kthehet në shtëpi dhe Belgjikën që gjen Italinë në fazën çerekfinale, por që nuk mund të festojë plotësisht për shkak të dëmtimit të De Bruyne.

Europiani për Holandën merr fund që në fazën e 1/8-ave. Ndonëse shorti ishte treguar bujar, “tulipanët” nuk ia dolën ta shfrytëzojnë dhe humbën në mënyrë të befasishme 0-2 ndaj Republikës Çeke në “Ferenc Puskas” të Budapestit, duke mbyllur aventurën Euro 2020.

Skuadra e drejtuar nga Franck De Boer kishte dhënë sinjale mjaft të mira në ndeshjet në grupe, pasi fitoi të tre takimet dhe e mbylli me 9 pikë të plota, teksa edhe sfidën e sotme ndaj çekëve e nisi mjaft mirë.

Pjesa e parë u zhvillua nën dominimin e holandezëve, që gjithsesi u treguan të pasaktë në pasimin e fundit dhe nuk arritën të kërcënojnë portën e çekëve, të cilët nga ana tjetër iu afruan golit me anë të mesfushorit të Veronës, Antonin Barak.

Minuta e 52-të ishte vendimtare për fatin e takimit, pasi Donyell Malen pati një rast flagrant shënimi, i nisur i vetëm drejt portës së Vaclik, por dështoi në tentativën për të dribluar këtë të fundit dhe humbi mundësinë e golit të avantazhit.

Nga ana tjetër portieri çek nisi menjëherë të tijtë në kundërsulm dhe tashmë ishte radha e mbrojtësit De Ligt që të gabonte, pasi në rrëzim e sipër, ndali topin me dorë, duke i hequr mundësinë e një rasti shënimi, sulmuesit Patrick Schick.

Vendimi i parë i arbitrit ishte për karton të verdhë, por pasi rishikoi aksionin në VAR, vendosi të dërgojë në dhomat e zhveshjes mbrojtësin e Juventusit dhe të lërë “tulipanët” me një futbollist më pak për më shumë se 35 minutat e mbetura.

Çekia shfrytëzoi maksimalisht epërsinë numerike, duke dalë gjithnjë e më shpesh në gjysmëfushën kundërshtare dhe arriti të gjejë golin e avantazhit në minutën e 68’ me anë të Holes.

Pas një krosimi të ardhur nga këndi, ishte mbrojtësi Kalas që kërceu mbi të gjithë dhe shërbeu për Holes, me këtë të fundit që shfrytëzoi edhe një dalje të gabuar të portierit Stekelenburg, për të dërguar topin në rrjetë.

Provon të reagojë menjëherë Holanda, por nuk ka as forcën fizike dhe a qartësinë e duhur për të vënë në vështirësi kundërshtarin, ndërsa në minutën e 80’ çekët zbresin në një kundërsulm të shpejtë dhe gjejnë golin e dytë, këtë herë me autor Patrick Schick, që shkon në kuotën e 4 golave të shënuar në këtë Europian.

Në minutat e mbetura pati vetëm disa tentativa të dëshpëruara të “tulipanëve” për të rihapur ndeshjen, por nuk arritën të krijojnë probleme për mbrojtësin Vaclik dhe vërshëllima finale e arbitrit rus Karasev, dërgoi holandezët në shtëpi e çekët në çerekfinale, ku do të përballen me Danimarkën.

Leave a Reply

Your email address will not be published. Required fields are marked *